भारतातील आर्थिक आणि व्यावसायिक घडामोडींच्या केंद्रस्थानी असलेल्या परकीय थेट गुंतवणुकीबाबत (FDI) महत्त्वाची आकडेवारी संसदेत मंगळवारी जाहीर करण्यात आली आहे. गेल्या आर्थिक वर्षात टेक गुंतवणूकदार आणि ग्लोबल कॅपेबिलिटी सेंटर्सच्या (GCCs) ओघामुळे कर्नाटक राज्यातील एफडीआय प्रवाह तब्बल १३ अब्ज डॉलरवर (जवळपास दुप्पट) पोहोचला आहे. मात्र, देशात सर्वाधिक FDI मिळवणाऱ्या महाराष्ट्रात मात्र सलग दोन वर्षांनंतर गुंतवणुकीत घट झाल्याचे दिसून आले आहे. सरकारच्या वतीने शेअर करण्यात आलेल्या या आकडेवारीनुसार, संपूर्ण भारतातील इक्विटी इनफ्लो १७.६% ने वाढून ५८ अब्ज डॉलर झाला आहे.
राज्यांची कामगिरी आणि गुंतवणुकीचा कल
देशातील विविध राज्यांचा विचार करता, कर्नाटकमध्ये FY25 मधील ६.६ अब्ज डॉलरवरून वाढ होऊन FY26 मध्ये ती १२.९ अब्ज डॉलर झाली असून यामध्ये तब्बल ९५% ची वाढ
नोंदवली गेली आहे. याशिवाय हरियाणामध्ये ४.५ अब्ज डॉलर (४४% वाढ), तामिळनाडूमध्ये ४.७ अब्ज डॉलर (२८% वाढ) झाली असून राजस्थान, उत्तर प्रदेश, आंध्र प्रदेश आणि पंजाबमध्येही इक्विटी इनफ्लोमध्ये महत्त्वपूर्ण वाढ झाली आहे. गुजरातची गुंतवणूक ५.७ अब्ज डॉलरवर स्थिर राहून त्यांनी देशात तिसरा क्रमांक कायम ठेवला आहे. दुसरीकडे, तेलंगणा राज्यात २५% घट होऊन गुंतवणूक २.३ अब्ज डॉलरवर आली आहे, तर देशात आघाडीवर असलेल्या महाराष्ट्रात ६% ची घट होऊन गुंतवणूक १९.६ अब्ज डॉलरवरून १८.४ अब्ज डॉलरवर घसरली आहे.
गुंतवणुकीचे स्वरूप आणि वाढ
एफडीआयच्या या मोठ्या प्रवाहात प्रामुख्याने तंत्रज्ञान कंपन्या, डेटा सेंटर, जीसीसी (GCCs) आणि ॲमेझॉन व फ्लिपकार्टसारख्या ई-कॉमर्स कंपन्यांचा मोठा सहभाग राहिला आहे. क्षेत्रनिहाय आकडेवारीनुसार, संगणक सॉफ्टवेअर आणि हार्डवेअर क्षेत्रात १३.९ अब्ज डॉलर तर वित्त, बँकिंग आणि विम्यासह सेवा क्षेत्रात १० अब्ज डॉलर गुंतवणूक झाली असून, या दोन्ही क्षेत्रांनी एकूण ५८.८ अब्ज डॉलरच्या एफडीआयपैकी जवळपास ४०% हिस्सा व्यापला आहे. विशेष म्हणजे, अन्न प्रक्रिया उद्योगात एफडीआय तब्बल सहा पटीने वाढून ३ अब्ज डॉलरवर पोहोचला आहे, तर औषध निर्माण (फार्मास्युटिकल्स) क्षेत्रात १.९ अब्ज डॉलर, वाहन उद्योगात २.५ अब्ज डॉलर आणि शिक्षण क्षेत्रात १.३ अब्ज डॉलरची मजबूत वाढ नोंदवली गेली आहे. याउलट, हवाई वाहतूक क्षेत्रातील एफडीआय सुमारे ७०% ने घसरून ३८३ दशलक्ष डॉलरवर आला असून इलेक्ट्रॉनिक्स क्षेत्रातील गुंतवणूक जवळपास निम्मी होऊन १.१ अब्ज डॉलरवर आली आहे.
