पंजाब नॅशनल बँकेची 105.44 कोटी रुपयांची कथित फसवणूक केल्याप्रकरणी केंद्रीय अन्वेषण विभागाने (CBI) एनसीएस शुगर्स लिमिटेड, त्याचे संचालक आणि इतर संबंधितांविरुद्ध मोठी कारवाई करत हैदराबाद, विजयनगरम आणि काकीनाडा येथील 10 ठिकाणी छापे टाकले. या कारवाईदरम्यान तपासासाठी महत्त्वाची कागदपत्रे आणि डिजिटल पुरावे जप्त करण्यात आले आहेत.
पंजाब नॅशनल बँकेच्या (PNB) चेन्नई शाखेने दाखल केलेल्या तक्रारीच्या आधारे सीबीआयच्या बेंगळुरू बँक सिक्युरिटीज अँड फ्रॉड शाखेने एनसीएस शुगर्स लिमिटेड, त्याचे संचालक तसेच अज्ञात सार्वजनिक सेवकांविरुद्ध गुन्हा नोंदवला आहे.
तपास यंत्रणेच्या प्राथमिक माहितीनुसार, आरोपींनी बँकेकडे बनावट कागदपत्रे सादर करून ती खरी असल्याचा आभास निर्माण केला. या आधारावर त्यांनी विविध कर्जसुविधा मिळवल्या. मात्र, मंजूर निधीचा नियोजित व्यावसायिक उद्देशासाठी वापर न करता तो अन्यत्र वळवून त्याचा गैरवापर केल्याचा आरोप आहे. त्यानंतर कर्जाची परतफेड न झाल्याने संबंधित खाते थकीत झाले आणि पंजाब नॅशनल बँकेला 105.44 कोटी रुपयांचे नुकसान झाल्याचा दावा करण्यात आला आहे.
हैदराबादसह तीन शहरांमध्ये छापेमारी
सीबीआयने हैदराबाद, विजयनगरम आणि काकीनाडा येथे एकाच वेळी 10 ठिकाणी शोधमोहीम राबवली. यामध्ये कंपनीचा कारखाना, नोंदणीकृत कार्यालय तसेच संचालकांच्या निवासस्थानांचाही समावेश होता.
तपासासाठी महत्त्वाचे पुरावे जप्त
छापेमारीदरम्यान अनेक महत्त्वाची कागदपत्रे, इलेक्ट्रॉनिक नोंदी आणि डिजिटल पुरावे जप्त करण्यात आले. या पुराव्यांच्या आधारे निधी नेमका कुठे वळविण्यात आला, आर्थिक व्यवहारांची साखळी कशी होती आणि या कथित कटात कोणकोण सहभागी होते, याचा तपास सीबीआय करत आहे.
पुढील तपास सुरू
सीबीआयने जप्त केलेल्या दस्तऐवजांचे आणि डिजिटल डेटाचे परीक्षण सुरू असून, कथित आर्थिक गैरव्यवहाराचे संपूर्ण स्वरूप आणि संबंधित व्यक्तींची भूमिका स्पष्ट करण्यासाठी पुढील तपास सुरू असल्याचे तपास यंत्रणेने म्हटले आहे.
