देशातील अग्रगण्य बँकिंग संस्था असलेल्या स्टेट बँक ऑफ इंडियाने (SBI) आपल्या देशभरातील शाखांचे जाळे अधिक मजबूत करणे आणि ग्राहक सेवांचा दर्जा उंचावणे या उद्देशाने तब्बल १,९३० सर्कल बेस्ड ऑफिसर (CBO) पदांवर नवीन नियुक्त्या केल्या आहेत.
सध्याच्या स्पर्धात्मक आर्थिक वातावरणात ग्राहकांना अधिक दर्जेदार आणि वेगवान सेवा मिळावी, यासाठी बँकेने अधिकारी वर्गात ही मोठी भर घातली आहे. हे नवीन अधिकारी शहरी, निमशहरी तसेच ग्रामीण भागातील शाखांमध्ये ग्राहक सेवा आणि सहभागाचा स्तर उंचावण्यासाठी महत्त्वाची भूमिका बजावणार आहेत. बँकेच्या ‘डिजिटल फर्स्ट, कस्टमर फर्स्ट’ या दूरदृष्टीला बळ देण्याच्या दिशेने हे एक महत्त्वपूर्ण पाऊल
मानले जात आहे. आजच्या घडीला देशभरात ५३ कोटींहून अधिक ग्राहकांचा विस्तार असलेल्या या बँकेसाठी हा निर्णय ग्राहकभिमुख सेवा अधिक प्रभावी करण्यासाठी फायदेशीर ठरणार आहे.
बँकेची मानवी संपत्ती आणि भविष्यातील गुंतवणूक
या नवीन अधिकाऱ्यांच्या स्वागताविषयी बोलताना एसबीआयचे अध्यक्ष छल्ला श्रीनिवासुलू सेटी यांनी सांगितले की, बँकेच्या परिवर्तनाच्या प्रवासात येथील कर्मचारी वर्ग हाच सर्वात मोठा आधार आहे. पिढ्यानपिढ्या ग्राहकांचा विश्वास संपादन केलेल्या या बँकेत हे तरुण अधिकारी अधिक सुलभ, वैयक्तिक आणि सहज उपलब्ध होणारे बँकिंग अनुभव देण्यासाठी महत्त्वाची भूमिका बजावतील. सध्या एसबीआयच्या सेवेत २ लाख ४५ हजारांहून अधिक कर्मचारी कार्यरत असून, बँक भविष्यातील आव्हानांना तोंड देण्यासाठी आपल्या मानवी संसाधनांमध्ये सातत्याने गुंतवणूक करत आहे. तंत्रज्ञानाचा भक्कम पाया आणि मानवी संवादाचा सुवर्णमध्य साधत ग्राहकांना उत्कृष्ट सेवा देण्यासाठी बँक कटिबद्ध असल्याचे या भरतीवरून स्पष्ट होते.
