देशातील अग्रगण्य बहुराज्य अनुसूचित सहकारी बँकांपैकी एक असलेल्या SVC को ऑपरेटिव्ह बँकेने आर्थिक वर्ष 2025 26 मध्ये सर्वच प्रमुख आर्थिक निर्देशांकांमध्ये मजबूत वाढ नोंदवली आहे. बँकेचा निव्वळ नफा 205 कोटी रुपये, एकूण व्यवसाय 43,693 कोटी रुपये आणि भांडवली पर्याप्तता 15.48 टक्क्यांवर पोहोचल्याची माहिती 120 व्या वार्षिक सर्वसाधारण सभेत देण्यात आली.
SVC को ऑपरेटिव्ह बँकेची 120 वी वार्षिक सर्वसाधारण सभा 18 जुलै 2026 रोजी पार पडली.
31 मार्च 2026 रोजी संपलेल्या आर्थिक वर्षासाठी सादर करण्यात आलेल्या लेखापरीक्षित आर्थिक अहवालानुसार बँकेचा एकूण व्यवसाय 43,693 कोटी रुपयांवर पोहोचला असून तो मागील वर्षाच्या तुलनेत 11.03 टक्क्यांनी वाढला आहे.
ठेवी 22,380 कोटी रुपयांवरून 24,956 कोटी रुपयांपर्यंत म्हणजेच 11.51 टक्क्यांनी वाढल्या. कर्जवाटपही 16,973 कोटी रुपयांवरून 18,737 कोटी रुपयांपर्यंत वाढत 10.40 टक्क्यांची वाढ नोंदवण्यात आली.
बँकेने आर्थिक वर्षात 205 कोटी रुपयांचा निव्वळ नफा कमावला. स्थूल एनपीए 2.69 टक्के आणि निव्वळ एनपीए 0.96 टक्के इतका राहिला. तसेच भांडवली पर्याप्तता गुणोत्तर 15.48 टक्क्यांवर पोहोचल्याने बँकेची आर्थिक स्थिती अधिक मजबूत झाल्याचे स्पष्ट झाले.
डिजिटल बँकिंग आणि विस्तारावर भर
गेल्या आर्थिक वर्षात बँकेने डिजिटल परिवर्तन, जोखीम व्यवस्थापन अधिक मजबूत करणे आणि निवडक ठिकाणी शाखा विस्तार यावर विशेष भर दिला. ग्राहक सेवा आणि कार्यक्षमतेलाही प्राधान्य देण्यात आल्याचे व्यवस्थापनाने स्पष्ट केले.
अध्यक्ष दुर्गेश एस. चंदावरकर यांनी सांगितले की, मजबूत प्रशासन, आर्थिक स्थैर्य आणि ग्राहकांचा विश्वास यावर आधारित संस्था उभारण्याचा बँकेचा प्रयत्न कायम राहील. संचालक मंडळ, व्यवस्थापन आणि कर्मचाऱ्यांच्या सामूहिक प्रयत्नांमुळे ही प्रगती शक्य झाली असून भविष्यातही शाश्वत वाढ आणि सदस्य तसेच ग्राहकांसाठी दीर्घकालीन मूल्यनिर्मितीवर भर राहणार आहे.
बँकेने आगामी काळात किरकोळ कर्ज, प्राधान्य क्षेत्रातील कर्जपुरवठा, विशेषतः एमएसएमई, परवडणारी गृहनिर्माण कर्जे आणि संस्थात्मक ठेवींवर अधिक लक्ष केंद्रित करण्याची योजना जाहीर केली आहे. देशभरातील उपस्थिती आणखी वाढवण्याचाही मानस व्यक्त करण्यात आला.
आर्थिक वर्षात बँकेला सहकारी बँकिंग, डिजिटल नवकल्पना आणि तंत्रज्ञान क्षेत्रातील अनेक प्रतिष्ठित पुरस्कार मिळाले. यामध्ये भारत रत्न सहकारिता सन्मान समारंभातील बेस्ट अर्बन को ऑपरेटिव्ह बँक, बेस्ट मल्टी स्टेट अर्बन को ऑपरेटिव्ह बँक आणि बेस्ट सीटीओ आयटी हेड पुरस्कारांचा समावेश आहे.
याशिवाय ऑल इंडिया को ऑपरेटिव्ह बँकिंग समिट अँड अवॉर्ड्समधील लीडिंग बँक अवॉर्ड, राष्ट्रीय अर्बन को ऑपरेटिव्ह बँकिंग समिटमधील डिजिटल बँकिंग इनोव्हेशन आणि सायबर सिक्युरिटी पुरस्कार, आयबीए बँकिंग टेक्नॉलॉजी कॉन्फरन्समधील विविध सन्मान, बँको ब्लू रिबन अवॉर्ड, मोस्ट इनोव्हेटिव्ह सीएफओ पुरस्कार आणि ईटी नाऊच्या बेस्ट ऑर्गनायझेशन्स टू वर्क 2025 या सन्मानांचाही समावेश आहे.
