शुक्रवारी देशांतर्गत शेअर बाजाराची सुरुवात घसरणीसह झाली. कच्च्या तेलाच्या वाढत्या किमती, अमेरिकेतील महत्त्वाच्या आर्थिक आकडेवारीपूर्वीची सावध भूमिका आणि जागतिक बाजारातील मिश्र संकेत यामुळे सेन्सेक्स व निफ्टी दबावाखाली दिसले. मात्र आयटी, ऑटो, एफएमसीजी आणि रिअल्टी क्षेत्रातील शेअर्समध्ये खरेदीचा कल कायम राहिला.
शुक्रवारी मुंबई शेअर बाजाराचा सेन्सेक्स 438.68 अंकांनी म्हणजेच 0.56 टक्क्यांनी घसरून 78,516.08 वर उघडला. तर राष्ट्रीय शेअर बाजाराचा निफ्टी 97.10 अंकांनी म्हणजे 0.39 टक्क्यांनी घसरून 24,538.90 वर व्यवहार सुरू झाला.
सकाळच्या सत्रात बँकिंग आणि वित्तीय क्षेत्रातील समभागांमध्ये विक्रीचा दबाव स्पष्ट दिसला. निफ्टी फायनान्शियल सर्व्हिसेस एक्स बँक, निफ्टी सिमेंट, निफ्टी पीएसयू बँक आणि निफ्टी प्रायव्हेट बँक निर्देशांकात सुमारे 1 टक्क्यांपर्यंत घसरण झाली.
आयटी, ऑटो आणि एफएमसीजीमध्ये खरेदीचा जोर
दुसरीकडे आयटी, ऑटोमोबाईल, रिअल्टी, एफएमसीजी आणि दूरसंचार क्षेत्रातील समभागांनी बाजाराला काहीसा आधार दिला. निफ्टी आयटी, निफ्टी मिड स्मॉल आयटी अँड टेलिकॉम, निफ्टी ऑटो, निफ्टी रिअल्टी आणि निफ्टी एफएमसीजी निर्देशांकात 1.5 टक्क्यांपर्यंत वाढ नोंदवली गेली.
पहिल्या तिमाहीच्या निकालांमधून काही महत्त्वाचे संकेतही समोर आले आहेत.
- वित्तीय सेवा, वाहन उद्योग, औषधनिर्मिती आणि दूरसंचार क्षेत्रातील बहुतांश कंपन्यांनी महसूल आणि नफ्यात दुहेरी अंकातील वाढ नोंदवली असून त्यामुळे या क्षेत्रातील समभागांना आधार मिळत आहे.
- आयटी क्षेत्राला मात्र मंदावलेल्या वाढीचा आणि कृत्रिम बुद्धिमत्ता (AI) मुळे निर्माण झालेल्या अनिश्चिततेचा सामना करावा लागत आहे.
- धातू आणि तेलासारख्या कमोडिटी क्षेत्रात संमिश्र चित्र दिसून येत आहे.
तज्ज्ञांच्या मते, वित्तीय सेवा, ऑटोमोबाईल, दूरसंचार आणि कॅपिटल गुड्स क्षेत्रातील वाढीचा वेग पुढेही कायम राहू शकतो. मात्र व्यापक बाजारातील समभागांचे मूल्यांकन आधीच उंचावल्याने त्यांची वाढ काही प्रमाणात मर्यादित राहण्याची शक्यता आहे.
कच्च्या तेलाच्या वाढत्या किमतींचा परिणाम
जागतिक स्तरावरील भू राजकीय तणावामुळे कच्च्या तेलाच्या किमतींमध्ये पुन्हा वाढ झाली आहे. आंतरराष्ट्रीय ब्रेंट क्रूडचा भाव 1 टक्क्यांहून अधिक वाढून प्रति बॅरल 83.83 डॉलरवर पोहोचला. तर अमेरिकेचे वेस्ट टेक्सास इंटरमिजिएट (WTI) क्रूडही 1 टक्क्यांपेक्षा अधिक वाढून प्रति बॅरल 78.42 डॉलरवर व्यवहार करत होते.
