भारतीय ऑटोमोबाईल उद्योगाने जुलै 2026 मध्ये आतापर्यंतची सर्वाधिक मजबूत जुलै विक्री नोंदवली आहे. प्रवासी वाहनांसह तीनचाकी आणि दुचाकी वाहनांच्या देशांतर्गत विक्रीत दुहेरी अंकी वाढ झाली. वाहन बाजारातील मजबूत मागणी आणि ग्राहकांचा सकारात्मक कल यामुळे आगामी सणासुदीच्या हंगामासाठी उद्योगाचा उत्साह वाढला आहे.
प्रवासी वाहनांची विक्री 4.57 लाखांवर
सोसायटी ऑफ इंडियन ऑटोमोबाईल मॅन्युफॅक्चरर्स अर्थात SIAM ने जाहीर केलेल्या आकडेवारीनुसार, जुलै 2026 मध्ये देशांतर्गत प्रवासी वाहनांची विक्री 4,57,810 युनिटवर पोहोचली. जुलै 2025 मध्ये ही विक्री 3,40,772 युनिट होती. म्हणजेच वर्षभरात प्रवासी वाहनांच्या विक्रीत 34.3 टक्क्यांची वाढ झाली.
या कालावधीत प्रवासी वाहने, तीनचाकी, दुचाकी आणि क्वाड्रिसायकल मिळून एकूण मासिक उत्पादन 33,70,958 युनिट्स इतके राहिले.
तीनचाकी वाहनांनाही मजबूत मागणी
तीनचाकी वाहनांच्या बाजारपेठेतही जुलै महिन्यात चांगली वाढ दिसून आली. देशांतर्गत विक्री 33.4 टक्क्यांनी वाढून 92,560 युनिट्स झाली. मागील वर्षी याच महिन्यात 69,403 तीनचाकी वाहनांची विक्री झाली होती.
यामध्ये प्रवासी वाहकांची विक्री 32.9 टक्क्यांनी वाढून 77,994 युनिट्स झाली. मालवाहू तीनचाकी वाहनांची विक्री तब्बल 40.3 टक्क्यांनी वाढून 12,896 युनिट्स झाली.
ई रिक्षांच्या विक्रीत 7.5 टक्के वाढ होऊन ती 1,132 युनिट्स झाली. ई कार्टची विक्री 16.2 टक्क्यांनी वाढून 538 युनिट्सवर पोहोचली.
दुचाकी बाजारात 22.6 टक्के वाढ
देशातील सर्वात मोठ्या वाहन बाजारांपैकी एक असलेल्या दुचाकी क्षेत्रानेही जुलैमध्ये मजबूत कामगिरी केली. जुलै 2026 मध्ये दुचाकींची देशांतर्गत विक्री 19,23,483 युनिट्स झाली. जुलै 2025 मधील 15,69,120 युनिट्सच्या तुलनेत ही 22.6 टक्के वाढ आहे.
यामध्ये मोटरसायकलची विक्री 20.7 टक्क्यांनी वाढून 10,74,796 युनिट्स झाली. स्कूटरच्या विक्रीत 23.7 टक्के वाढ झाली असून ती 7,98,190 युनिट्सवर पोहोचली.
मोपेडची विक्री सर्वाधिक वेगाने वाढली. या श्रेणीतील विक्रीत 48.6 टक्के वाढ होऊन जुलैमध्ये 50,497 युनिट्सची विक्री झाली.
सणासुदीच्या हंगामाकडून उद्योगाला अपेक्षा
SIAM चे महासंचालक राजेश मेनन यांच्या मते, प्रवासी वाहने, तीनचाकी आणि दुचाकी या प्रमुख विभागांमध्ये दुहेरी अंकी वाढ झाल्याने जुलै महिना ऑटो उद्योगासाठी अत्यंत मजबूत ठरला आहे.
महत्त्वाचे म्हणजे ही सकारात्मक स्थिती केवळ एका महिन्यापुरती मर्यादित नसून गेल्या काही महिन्यांपासून उद्योगात अशीच गती दिसत आहे. त्यामुळे आगामी सणासुदीच्या काळात ग्राहकांचा सकारात्मक प्रतिसाद मिळण्याची उद्योगाला अपेक्षा आहे.
क्वाड्रिसायकलच्या बाबतीत मात्र जुलैमध्ये देशांतर्गत विक्री केवळ 4 युनिट्स इतकी नोंदवली गेली.
