बँक ऑफ बडोदावर झालेल्या कथित सायबर हल्ल्यानंतर ग्राहकांचा आधारसह संवेदनशील डेटा लीक झाल्याच्या दाव्यांवर बँकेने स्पष्टीकरण दिले आहे. हा प्रकार केवळ एका कर्मचाऱ्याच्या ईमेल खात्यापुरता मर्यादित असल्याचे बँकेने स्पष्ट केले असून, कोअर बँकिंग प्रणालीवर कोणताही परिणाम झालेला नसल्याचा दावा केला आहे. तसेच संपूर्ण प्रकरणाचा फॉरेन्सिक तपास सुरू करण्यात आला आहे.
बँक ऑफ बडोदाने सायबर सुरक्षेशी संबंधित अलीकडील घटनेबाबत अधिकृत निवेदन जारी करत स्पष्ट केले की, बँकेच्या मजबूत माहिती सुरक्षा प्रणालीमुळे कोअर बँकिंग नेटवर्क सुरक्षित आहे. या घटनेत एका कर्मचाऱ्याच्या ईमेल खात्यावर अनधिकृत प्रवेश मिळवण्यात आला होता. त्यातून काही माहितीपर्यंत अनधिकृत प्रवेश झाल्याचे समोर आले.
बँकेच्या म्हणण्यानुसार, हा प्रकार लक्षात येताच तातडीने नियंत्रणात्मक उपाययोजना करण्यात आल्या. याशिवाय, नियामक संस्थांच्या मार्गदर्शक तत्त्वांनुसार संबंधित अधिकाऱ्यांशी समन्वय साधून व्यापक फॉरेन्सिक तपास सुरू करण्यात आला आहे.
सोशल मीडियावरील दाव्यांमुळे प्रकरण चर्चेत
या प्रकरणाची चर्चा सोशल मीडिया प्लॅटफॉर्म X वरील काही पोस्टनंतर सुरू झाली. त्यामध्ये बँकेशी संबंधित सुमारे 1 टेराबाइट डेटा अनधिकृतरीत्या लीक झाल्याचा दावा करण्यात आला होता. काही इंटरनेट सुरक्षा संकेतस्थळांनीही बँकेशी संबंधित असल्याचा दावा करण्यात आलेला डेटासेट ऑनलाइन उपलब्ध असल्याचे वृत्त दिले.
ग्राहकांची माहिती लीक झाल्याचा दावा
डिजिटल पेमेंट क्षेत्रात ग्राहक जनजागृती करणाऱ्या Cashless Consumer या संस्थेचे संस्थापक श्रीकांत लक्ष्मणन यांनी दावा केला की, लीक झालेला डेटासेट घटनेनंतरही ऑनलाइन उपलब्ध होता. त्यांच्या मते, या डेटामध्ये ग्राहकांची नावे, संपर्क माहिती, बँक खात्यांशी संबंधित माहिती, आधारशी जोडलेली ओळखविषयक माहिती तसेच बँकेतील काही अंतर्गत कागदपत्रांचाही समावेश होता.
त्यांनी या डेटासेटचा डाउनलोड लिंक सक्रिय असल्याचा दावा करत काही नमुना स्क्रीनशॉट्सही शेअर केल्याचे सांगितले.
फॉरेन्सिक तपासावर बँकेचा भर
बँक ऑफ बडोदाने मात्र ग्राहकांच्या हिताचे संरक्षण आणि माहिती सुरक्षेला सर्वोच्च प्राधान्य असल्याचे पुन्हा स्पष्ट केले आहे. सध्या फॉरेन्सिक तपास सुरू असून तपासाचा अंतिम अहवाल आल्यानंतरच डेटा लीकची व्याप्ती आणि त्याचा प्रत्यक्ष परिणाम स्पष्ट होण्याची शक्यता आहे
सध्या बँकेने कोअर बँकिंग प्रणाली सुरक्षित असल्याचा दावा केला असला तरी, कथित लीक झालेल्या डेटाबाबत स्वतंत्र तपास सुरू आहे. त्यामुळे तपासाचा निष्कर्ष समोर येईपर्यंत या प्रकरणातील अनेक बाबी स्पष्ट होणे बाकी आहे. ग्राहकांनी अधिकृत माहितीवरच विश्वास ठेवावा आणि संशयास्पद संदेश, ईमेल किंवा फिशिंग लिंकपासून सावध राहण्याचा सल्ला तज्ज्ञांकडून दिला जात आहे.
