भारताच्या विमा क्षेत्रात मोठी गुंतवणूक करण्यासाठी अमेरिकेची खासगी इक्विटी कंपनी ब्लॅकस्टोनने एचडीएफसी एरगोचे माजी मुख्य कार्यकारी अधिकारी अनुज त्यागी यांच्यासोबत ‘NxSure’ या नव्या नॉन लाइफ विमा कंपनीसाठी IRDAI कडे परवान्यासाठी अर्ज केला आहे.
भारताच्या वाढत्या आर्थिक बाजारपेठेत आपली पकड आणखी मजबूत करण्यासाठी अमेरिकेची जागतिक खासगी इक्विटी फर्म ‘ब्लॅकस्टोन’ने एक महत्त्वपूर्ण पाऊल उचलले आहे. देशाच्या विमा क्षेत्रात पहिल्यांदाच प्रवेश करताना, ब्लॅकस्टोनने ‘एचडीएफसी एरगो’चे माजी मुख्य कार्यकारी अधिकारी अनुज त्यागी यांच्याशी व्यावसायिक हातमिळवणी केली आहे. या धोरणात्मक भागीदारीअंतर्गत ‘NxSure’ या नवीन ब्रँड नावाने नॉन-लाइफ इन्शुरन्स व्यवसाय सुरू करण्याची जोरदार तयारी सुरू आहे. या प्रस्तावित व्यावसायिक उपक्रमासाठी दोन्ही भागीदारांनी मिळून देशाची विमा नियामक संस्था असलेल्या ‘इन्शुरन्स रेग्युलेटरी अँड डेव्हलपमेंट अथॉरिटी ऑफ इंडिया’ (IRDAI) कडे अधिकृत परवान्यासाठी अर्ज सादर केला आहे. या संयुक्त प्रकल्पाच्या मालकी हक्काबाबत बोलायचे झाले, तर ब्लॅकस्टोनकडे या नवीन कंपनीची ९० टक्के समभाग (इक्विटी) हिस्सेदारी असेल, तर उर्वरित १० टक्के मालकी हक्क अनुज त्यागी यांच्याकडे राहतील. विशेष म्हणजे, ग्राहकांना डिजिटल आणि अत्याधुनिक सेवा देण्याच्या उद्देशाने या कंपनीच्या सर्व नॉन-लाइफ इन्शुरन्स उत्पादनांमध्ये कृत्रिम बुद्धिमत्तेचा (AI) विशेष भर असणार आहे.
विमा क्षेत्रातील आर्थिक ओघ
गेल्या काही वर्षांत भारतीय विमा उद्योगात खाजगी इक्विटी आणि व्हेंचर कॅपिटल कंपन्यांचा सहभाग हळूहळू पण निश्चितपणे वाढत असल्याचे दिसून येत आहे. वैकल्पिक गुंतवणूक उद्योग संघटना ‘आयव्हीसीए’ (IVCA) आणि ‘ईवाय’ (EY’s) च्या संयुक्त अहवालानुसार, २०२५ मध्ये
भारतातील विमा क्षेत्रातील अधिग्रहण आणि गुंतवणुकीचे एकूण मूल्य १९६ दशलक्ष डॉलर वर पोहोचले आहे, जे मागील वर्षी २०२४ मध्ये १५६ दशलक्ष डॉलर इतके होते. तसेच, या कालावधीत एकूण व्यवहारांची संख्या २०२४ मधील ८ वरून वाढून २०२५ मध्ये ९ झाली आहे. परदेशी गुंतवणूकदारांनी यापूर्वीही भारतीय बाजारात अनेक मोठे आर्थिक करार केले आहेत. उदाहरणार्थ, २०१८ मध्ये वारबर्ग पिनकसने ‘इंडियाफर्स्ट लाईफ इन्शुरन्स’मध्ये अल्पसंख्याक हिस्सा खरेदी केला होता, तर २०१९ मध्ये ट्रू नॉर्थने ‘मॅक्स बुपा हेल्थ इन्शुरन्स’ची बहुसंख्य मालकी अपने ताब्यात घेतली होती. याशिवाय, गेल्या वर्षी ऑक्टोबर महिन्यात ब्लॅकस्टोनने ३५० दशलक्ष डॉलर खर्च करून ‘एस इन्शुरन्स ब्रोकर्स’चे अधिग्रहण केले होते, ज्यामुळे त्यांचा भारतातील पाया आधीच मजबूत झाला आहे.
भविष्यातील धोरण आणि व्यावसायिक परिणाम
नियामक संस्था इर्डाकडून (IRDAI) अंतिम मंजुरी मिळाल्यानंतर ‘NxSure’ च्या माध्यमातून भारतीय बाजारात एका नव्या तंत्रज्ञान-केंद्रित युगाची सुरुवात होईल. पारंपारिक पद्धतींना फाटा देत एआय (AI) तंत्रज्ञानाच्या साहाय्याने ग्राहकांना जलद क्लेम प्रक्रिया आणि सुलभ सेवा देण्याचा या नवीन कंपनीचा मानस आहे. ब्लॅकस्टोनची भक्कम आर्थिक ताकद आणि अनुज त्यागी यांच्या व्यावसायिक अनुभवामुळे देशांतर्गत नॉन-लाइफ इन्शुरन्स बाजारात स्पर्धा अधिक तीव्र होण्याची दाट शक्यता आहे.
